Gipahibalo sa City Public Safety Office sa General Santos nga nagplano sila sa 24-oras nga monitoring sa CCTV aron mas mapadali ang pag-responde sa mga insidente ug krimen sa dakbayan. Sumala ni City Public Safety Officer Atty. Jong Gonzales, kulang pa ang personnel nga magbantay sa CCTV, ug sa pagkakaron, ang monitoring nagasugod alas 5 sa buntag hangtod alas 10 sa gabii, samtang walay nagabantay gikan alas 10 sa gabii hangtod alas 4 sa buntag.
Giawhag ang mga interesado, labi na ang mga Electronics Communication Engineer o bisan kinsa nga adunay kahibalo sa electronics ug communication, nga mo-apply sa Public Safety Office. Kung limpyo ang records, dali ra ang pag-hire sa mga kwalipikado nga aplikante aron mapuno ang kakulangan sa monitoring personnel.
Ang panginahanglan alang sa 24/7 monitoring nagsumikad tungod sa sunod-sunod nga shooting incidents sa dakbayan, diin pipila niini nasakpan sa CCTV. Matod ni Gonzales, pinaagi sa padayon nga monitoring sa CCTV, mas dali ang pag-ila sa mga insidente ug ang pagpadala dayon sa mga nagkinahanglan og tabang sa publiko.
Photo Courtesy: Google Map
