Gipahigayon ang public hearing kabahin sa proposed provincial ordinance nga magdeklara sa usa ka bahin sa Pantaron Mountain Range isip Local Conservation and Protected Area (LCPA) niadtong nakalabay nga adlaw, sa Sitio Kapatagan Elementary School Gymnasium, Barangay Gupitan, Kapalong, Davao del Norte.
Gipangulohan nila Board Members Ronald S. Elliot ug Orly A. Amit ang maong panagtigum kauban ang nagkalain-laing ahensya sa gobyerno aron hisgutan ang ordinansa nga naglangkob sa 30,660.279 ka ektarya nga nahimutang sa Barangays Sto. Niño, Palma Gil, ug Dagohoy sa Talaingod, ug Barangay Gupitan sa Kapalong, isip protektadong lugar sa probinsya.
Ang ordinansa, nga gi-author ni BM Amit ug gi-co-author ni BM Elliot, gitumong sa pagpreserba sa Pantaron Mountain Range, pagpanalipod sa kinaiyahan, ug pagtabang sa mga lumad nga komunidad, lakip ang pagpugong sa illegal logging ug uban pang makadaot nga kalihokan.
Gipasabot nga ang maong kabukiran maoy dakong tinubdan sa tubig nga nagsuporta sa daghang komunidad sa Davao del Norte.
Human mapatin-aw ang sulod sa maong sugyot, mipadayag og suporta ang mga kaigsoonang lumad. Matod ni Provincial Chieftain Arthuro Davao, ang Pantaron maoy tinubdan sa pagkaon ug panginabuhian sa IPs, ug dili maapektuhan ang ilang tradisyon ug kultura kon mapatuman ang ordinansa.
Mitambong usab sa hearing sila Forester John Tuba sa MENRO Kapalong, Municipal Tourism Officer-Designate Roderick Parcon, representante sa CENRO-New Corella nga si Maritess Jocson, ug NCIP representative Melanie Jay Senile.
Gipalig-on sa LGU Kapalong ang mga lakang batok illegal logging, reforestation, ug community-based forest protection aron masiguro ang malungtarong pagdumala sa Pantaron Mountain Range alang sa kinaiyahan, watershed, ug umaabot nga henerasyon.
Photo courtesy : Kapalong InfoCenter
