Na-videohan sa Protected Area Management Office sa Sarangani Bay Protected Seascape (PAMO-SBPS) ang usa ka mother ug calf dugong nga gasalom-salom sa dagat sa Kiamba atol sa monitoring activity niadtong nakalabay nga adlaw. Ang duha ka dugong nakit-an nga normal ug maayo ang ilang interaksyon.
Sa laing bahin, niadtong Pebrero 7, usa ka patay nga dugong napadpad sa baybayon sa General Santos City. Base sa report sa Bantay Dagat ug sa mga kasilinganan nga nakakita una sa insidente, buhi pa ang hayop sa unang pagkakita. Sumala sa necropsy sa Marine Wildlife Rescue Center, napamatud-an nga buntis diay kini. Gibana-bana nga ang timbang niini anaa sa 400–500 kg, ug posible hapit na unta manganak.
Ang dugong gi-klasipikar nga critically endangered ubos sa DAO 2019-09 ug nagdepende sa himsog nga seagrass ecosystem. Kuyaw kini sa mga hulga sama sa boat strikes, pagkadaut sa habitat, pagkapukot sa lambat, ug marine pollution.
Gipahimangnoan ang publiko nga motabang sa pagpanalipod sa mga dugong pinaagi sa pagpalayo niini kung dunay makit-an, dili pagdakop, ug tarong nga paglabay sa basura.
Photo Courtesy: DENR SOCCSKSARGEN
