Patay ang usa ka motorista, human kining nibangga sa nagub-ang Wingvan sa Barangay Sibawan, Kidapawan City, alas 5 sa buntag niadtong adlawng Domingo Pebrero 8, 2026.
Giila ang biktima nga si Arnel Candiban, 33-anyos, minyo, laborer ug residente sa Barangay Bagumbayan, Magpet, Cotabato, kinsa nagmaneho sa Skygo nga motorsiklo. Samtang giila usab ang driver sa Wingvan nga si Jefry Canja Lingaro, 40-anyos, minyo ug residente sa Purok 2, Barangay Mahongkog, Magpet Cotabato.
Sumala pa sa driver sa Wingvan, nga nagub-an kini og kompleto matod pa ang mga warning device nga gibutang sa palibot niini. Nasayran, nga puno og kargang semento ang maong Wingvan ug pauli na unta kini sa Magpet gikan sa syudad sa Davao.
Dugang pa, nga paspas ang dagan sa biktima paingon sa Magpet nga walay suga, hinungdan nga nibangga kini ug naakhiagom og samad sa lain-laing partes a lawas nga miresulta sa iyang hinanaling kamatayon.
Gidala pa kini sa balay tambalanan, apan gideklara kining dead on arrival sa doctor.
Sa kasamtangan, padayon pa ang gihimong imbestigasyon sa Kidapawan City PNP may kalabutan sa maong panghitabo.
