Gipahibalo sa Municipal Civil Registrar sa LGU Nabunturan, Davao de Oro nga si Anievic Cuezon nga ang tanang Filipino citizen nga 18-anyos pataas og nagtinguhang magpakasal kinahanglan moagi sa Marriage License Application.
Sumala kang Cuezon, atol sa pagbisita sa Juander Radyo News Team sa maong buhatan, lakip sa mga kinahanglan isumite sa aplikasyon ang Certificate of No Marriage o CENOMAR, PSA Birth Certificate, bag-o o recent nga sedula, ug Tree Planting Certification nga giisyu sa barangay o purok diin sila sakop.
Dugang pa niya, mandatory usab ang Pre-Marriage Orientation and Counseling. Lahi-lahi sab ang mga requirements depende sa edad sa aplikante .
Gipasabot sa Municipal Civil Registrar nga ang mga aplikante sa kasal kinahanglan pareho nga single ug walay legal nga babag sa pagpakasal, lakip na ang mga adunay foreigner nga partner.
Base sa edad, ang 18–20 anyos gikinahanglan og Consent of Parents, ang 21–24 anyos kinahanglan og Parents Advice, samtang ang 25-anyos pataas duha ka witnesses na lamang.
Gipasabot usab sa opisina ang paggamit sa PSA o National ID isip balido ug unang identification. Samtang gipahinumduman sa opisina sa Civil Registrar ang publiko, nga siguruhon ang kompleto ug sakto nga mga dokumento aron malikayan ang kalangay sa pagproseso sa marriage license.
