Gikumpirma sa Food and Drug Administration (FDA), nga nakadawat kini og 25 ka mga taho kalabot sa boluntaryong pag-recall sa pipila ka batch sa Nan Optipro ug Nankid Optipro nga gatas sa masuso ug bata.
Niini nga mga taho, 18 ang naglambigit sa mga isyu sa panglawas nga nasinati sa mga bata human makakonsumo sa mga apektadong produkto.
Ang gitaho nga mga simtomas naglakip sa pagsuka, kalibanga ug sakit sa tiyan, ug pipila ka mga kaso nanginahanglan pagtambal sa ospital.
Niining bahina, gipasalig sa FDA nga padayon kining nagrepaso sa tanang report ug nakigkontak sa mga hingtungdan nga ahensya, ingon man sa Nestlé Philippines, Inc., aron maseguro nga ang pagbawi sa maong mga produkto mapatuman sa hustong paagi.
Gitambagan usab ang mga ginikanan ug mga tig-atiman nga bantayan pag-ayo ang kahimsog sa mga bata ug magpakonsulta dayon sa doktor kung adunay mga simtomas.
Photo Courtesy: FDA
