Giangkon sa National Intelligence Coordinating Agency (NICA) nga nakagawas na sa Pilipinas ang kanhing local civil registrar sa Sta. Cruz, Davao del Sur, nga gitudlong responsable sa pagpagawas og peke nga birth certificate sa kapin 1,300 ka Chinese nationals sa maong lungsod.
Gibutyag kini sa ahensya atol sa pagdungog sa Senado karong semanaha, nga maoy hinungdan sa kakulang sa kalambuan sa kasong gipasaka sa Office of the Ombudsman batok sa kanhing opisyal.
Kahinumduman nga niadtong 2024, nasuta ang daghang late registration sa mga birth certificate nga kadaghanan para sa mga Chinese national.
Nasuta usab sa mga otoridad nga peke ang maong mga dokumento ug nalambigit sa iligal nga transaksyon sa rehistro sibil.
Photo Courtesy to: Philippine News Agency
