Tulo (3) ka lokal nga rebel returnees ang opisyal nga misurender ug mipili nga mobalik sa sabakan sa gobyerno atol sa Joint Peace and Reintegration Ceremony nga gipahigayon kagahapong adlawa, Oktubre 27, 2025, sa lungsod sa Cabanglasan ning Lalawigan sa Bukidnon.
Ang maong kalihukan gipangulohan sa 8th Infantry “Dependable” Battalion, Philippine Army, ubos sa pangamando ni Lt. Col. Jeorge R. Jallorina, ug gi-representahan ni Maj. Allen Mark B. Tacorda (INF) PA, uban sa presensya ni Congressman Atty. Jonathan Keith Flores, 2nd District Representative, ug Mayor Bernie C. Castillanes sa LGU-Cabanglasan.
Nagpasiugda kini sa dakong paningkamot sa lokal ug militar nga awtoridad sa paghatag og higayon sa mga kanhing rebelde nga magbag-o ug mobalik sa malinawon nga kinabuhi. Isip kabahin sa reintegration program, usa sa mga nagsurender nakadawat og ₱100,000 nga pinansyal nga tabang, usa ka saad nga gipamulong pa sa miaging administrasyon kaniadtong Hunyo 27, 2025, apan karon natuman pinaagi sa panaghiusa ug suporta ni Mayor Castillanes ug Congressman Flores.
Gipasidunggan usab si 1Lt. Arnel E. Villa ug ang tibuok 8IB, 88IB, ug AFP Team tungod sa ilang dakong papel, dedikasyon, ug walay puas nga suporta sa pag-andam ug pagdumala sa maong kalihukan. Ang ilang koordinasyon nagpakita sa tinud-anay nga serbisyo ug pagtinabangay tali sa militar ug lokal nga pangagamhanan alang sa kalamboan ug kalinaw sa komunidad.
Uban sa presensya sa lokal nga media, ang kalihukan nagpakita sa padayon nga komitment sa gobyerno alang sa inclusive peace, rehabilitasyon, ug reintegrasyon sa mga lumad ug katawhan nga gustong magbag-o. Pinaagi sa pagtambayayong sa AFP, LGU, ug kongresyonal nga liderato, nagpadayon ang Cabanglasan sa pagtukod sa mas luwas, malinawon, ug naghiusang komunidad alang sa kalampusan sa tanan.
via: LGU Cabanglasan
