Dako ang gilauman nga “Return on Investment” (ROI) sa syudad sa Malaybalay sa pagpatuman sa Digital Malaybalay City system (DIGIMC 2025). Kini ang gibutyag ni City Economic Enterprise Development and Management Office (CEEDMO) Head Romeo Lapeciros atol sa gipahigayon nga DIGIMC 2025 forum sa Bukidnon State University Audio-Visual Center kagahapon Oktobre28, 2025
Sumala pa ni Lapeciros, dako ang epekto sa maong programa sa sektor sa turismo ug sa pagpa-improve sa mga Medium and Small Enterprises (MSEs) sa syudad. Giingon niya nga ang DIGIMC 2025 dili lamang maghatud sa syudad sa mas taas nga lebel sa kalambuan, apan usab magpasayon sa paggamit sa Artificial Intelligence (AI), nga gilangkuban sa maong sistema ug giingong kabahin sa umaabot sa tibuok kalibutan.
Apan aron mapalapad ang coverage sa DIGIMC system, matag barangay sa syudad pasudlon usab sa Starlink Internet Connection nga nagkantidad og ₱1.5 milyon, aron masiguro nga maabot ang serbisyo bisan sa mga kasikbit nga lugar.
Gawas niini, mapadali na usab sa katawhan ang pagsubay sa procurement proceedings, public biddings sa mga proyekto, ug uban pang lihok sa pondo sa kaban sa syudad, nga nagpalig-on sa transparency policy sa gobyerno.
Ang DIGIMC 2025, sumala sa mga opisyal, nagtan-aw sa pagdala sa Malaybalay City ngadto sa smart city nga modelo, diin ang teknolohiya ug innovation magpasiugda sa mas episyente ug accountable nga serbisyo publiko.
via: LGU Malaybalay
