Gibutyag sa Department of Social Welfare and Development (DSWD) Field Office Caraga nga hangtod Setyembre 2025, nakaluwas ug nakatabang sila sa 31 ka mga biktima sa human trafficking pinaagi sa Regional Recovery and Reintegration Program for Trafficked Persons (RRPTP).
Sa maong gidaghanon, 23 niini mga kababayen-an 11 ang mga hamtong ug 12 ang mga menor de edad samtang walo (8) ang mga lalaki.
Ang datos nagpakita nga ang kababayen-an, kabataan, ug mga batan-ong lalaki maoy pinakabulnerable nga biktima sa sexual ug labor exploitation, lakip na ang online sexual abuse and exploitation of children (OSAEC).
Pinaka daghang nabiktima anaa sa edad 18 hangtod 30 anyos (13 kaso), gisundan sa 13 hangtod 17 anyos (11 kaso), 0 hangtod 12 anyos (5 kaso), ug 31 hangtod 59 anyos (2 kaso).
Aron matabangan ang mga biktima nga makabawi sa ilang dili maayong kasinatian, ang RRPTP usa ka espesyal nga programa sa DSWD nga nagtumong sa paghatag comprehensive psychosocial, social, ug economic support alang sa ilang pagbangon ug pagbalik sa normal nga kinabuhi sulod sa komunidad.
Kasamtangan, gipalig-on sa DSWD Caraga ang pakigtambayayong sa Regional Inter-Agency Committee Against Trafficking – Violence Against Women and Children (RIACAT-VAWC), mga lokal nga panggamhanan (LGUs), mga law enforcement agencies, ug civil society organizations aron mapugngan ang human trafficking ug mapanalipdan ang mga bulnerableng sektor, ilabi na ang kababaihan ug kabataan.
Photo courtesy: PNA
