Miresulta sa kamatayon sa usa ka mananagat ang sumbagay tali sa laing mananagat nga nahitabo sa Purok Sanib Langis, Barangay Poblacion, Tabina, Zamboanga del Sur, kaganinang kadlawon, Oktubre 16, 2025.
Sa inisyal nga imbestigasyon sa kapulisan, kauban nga nagkargahay ug ice ang biktima ug ang suspetsado sa ilang sakayan apan aksidente nga nahulugan sa gibitbit nga ice sa suspetsado ang tiil sa biktima hinungdan sa ilang panaglalis.
Kini miresulta sa pagpanumbag una sa biktima ngadto sa suspetsado nga gibawsan usab sa suspetsado hinungdan sila susama nga nawad-an ug balanse.
Ang suspetsado natumba paingon sa balason nga bahin apan way swerte nga ang biktima natumba sa lugar nga adunay dakong bato hinungdan sa pagkapantok sa iyang ulo.
Gisulayan pa ug dala ang biktima sa Rural Health Unit sa Tabina apan gideklara nang wa nay kinabuhi sa mi-atiman nga doctor.
Human sa hitabo ang suspetsado misibat sa maong lugar hinungdan sa karon padayon pang naglusad ug hot pursuit operation ang Tabina MPS aron madakpan ang suspetsado.
Photo courtesy to: PD ZSPPO, PRO 9
