Nalisang matud pa ang pamilya sa usa ka lalaki nga gituohang namatay, human nga kalit na lamang kining miubo sa iyang haya.
Sumala pa sa report sa South China Morning Post, nailahan ang maong lalaki nga si Bhau Lachke, 19-anyos, gikan sa nasud India, diin una na matud pa kining gideklarang namatay, tungod sa mga nahiagumang grabeng bun-og sa lawas human nga nalambigit sa disgrasya.
Sumala pa sa iyang pamilya, wala na gayud matud pa sila’y nakita nga tyansa nga makalingkawas pa sa kamatayon ang biktima, hinungdan ila nga giprepara ang haya niini.
Apan sa unang adlaw pa lamang sa haya, kalit na lamang silang nakurat human nga nakadungog ug ubo sa mismong nahimutangan sa patay’ng lawas ni Bhau, hinungdan nga dali nila kining gidala ug balik sa balay-tambalanan.
Subay niini, gikonsidera sa maong pamilya nga usa ka milagro ang nahitabo ngadto sa ilang kabanay, kung diin nanghinaot matud pa sila nga maka-rekober dayon kini, bisan pa man sa iyang kritikal nga kahimtang.
Dugang pa sa taho, una nang giingon sa mga doktor nga nakahiagom lamang ug “brain dead” ang biktima ayha pa nila hayaa, apan daw wala kini masabtan pag-ayo sa pamilya.
Gi-klaro usab sa ospital nga wala gayud sila mideklara nga patay na ang biktima, kung diin padayon pa usab karon ang pagpahigayon ug imbestigasyon kabahin sa maong pangitabo.
Photo courtesy to:South China Morning Post
