Gisusi sa Philippine Anti-Corruption Commission pinaagi ni VADM Andres Visaya Jr,(PCRGA) ang Riprap sa Sitio Lamintao, Brgy. Rizal, Surigao City aron masiguro nga ang mga materyales, labi na ang sheetpiles ug ang gitas-on niini, nisubay ba gayud sa standard ug husto nga kalidad alang sa flood control.
Tubag kini sa dugay nang reklamo sa mga residente sa lugar sanglit ang maong portion sa flood control project nga nabungkag gumikan ni bagyong Odette niadtong Disyembre 2021. Wala pa gihapon maatiman hangtod sa kasamtangang tuig 2025.
Butyag ni Visaya nga angayang panubayan sa DPWH ang maong proyekto sa Contractor sanglit aduna matud pa kini warranty. Ang 5 ka tuig nga warranty sa contractor sa government project nagpasabot nga moatiman sila sa proyekto sulod sa lima ka tuig human matapos.
Kung dunay depekto sa trabaho o materyales, obligadong ayohon o ilisan kini nga walay gasto ang gobyerno. Apan dili lakip niini ang danyos tungod sa kalamidad, sama sa bagyo o linog, gawas kung napamatud-an nga ang depekto tungod sa daotang trabaho o materyales.
Sumala sa GPPB Guidelines, gisiguro ang warranty aron maprotektahan ang pondo sa gobyerno ug masiguro ang kalidad sa proyekto para sa katawhan. Angayan masayran nga ang PACC, usa ka independent ug volunteer-driven organization, wala nagadawat og pondo gikan sa gobyerno.
Gisiguro niini ang transparency, proteksyon sa public funds, ug accountability aron ang tanan nga pondo sa public projects magamit gyud alang sa katawhan.
