Gipahibalo sa Tandag City Water District (TCWD) nga sugod Oktubre 2025, dili na kini mag-isyu og Notice of Disconnection ngadto sa mga konsumante nga malangan sa ilang bayad sa water bill.
Sumala sa pamahayag sa TCWD, ang iskedyul sa due date ug disconnection date ipahibalo na lamang pinaagi sa opisyal nga Facebook page sa ahensya.
Gipasabot sa management nga ang maong lakang kabahin sa ilang gitinguhang mas episyente ug mas hapsay nga pamaagi sa pagpahibalo sa publiko. Gipangayo usab sa ahensya ang kooperasyon ug pagsabot sa tanan nilang konsumante aron malikayan ang kalangan sa bayad ug kalit nga pagkadula sa serbisyo sa tubig.
Giawhag sa TCWD ang publiko nga kanunayng mosubay sa ilang opisyal nga social media account alang sa mga update ug pahibalo bahin sa schedule sa bayad ug disconnection.
Photo courtesy: Tandag City WD
