Giawhag sa Department of Migrant Workers (DMW) ang tanang overseas Filipino workers (OFWs) niadtong Martes, Setyembre 9, 2025, sa pag-download sa “Kumusta Kabayan App.”
Sa usa ka pahayag, ang DMW miingon nga ang mga OFWs mahimong maka-download sa bag-ong gilusad nga app sa ilang mga mobile phone aron mas paspas ug makatabang sa ilang panginahanglan sa bisan unsang emergency, matud sa DMW.
Usa kini ka digital welfare monitoring system nga gitumong sa pagsiguro sa kaluwasan ug kaayohan sa mga OFWs bisan asa sa kalibutan. Pipila sa mga feature sa app naglakip sa survey, diin ang mga OFWs makatubag sa ilang sitwasyon sa ilang amo, sa kalidad sa ilang trabaho ug kahimtang sa pagpuyo, ug kung husto ba ang ilang suholan nga gihatag sa tukmang panahon.
Naghatag usab ang app sa kompletong hotline numbers sa DMW-Owwa (1348), nga mahimong tawagan sa mga OFWs 24/7 alang sa bisan unsang emerhensya; ingon man ang mga hotline number sa Migrant Workers Offices (MWOs) ug DMW Regional Offices.
Dugang matod nga aduna usab feature ang maong app diin ang mga OFWs makapangayo ug tabang sa DMW, sama sa repatriation, legal, financial, ug reintegration assistance.
Sa ulahi, segun ni Migrant Workers Secretary Hans Leo Cacdac nga ang pagpaila sa app maoy usa ka paagi aron mas sayon ang pagmonitor sa mga OFWs.
Photo Courtesy: Department of Migrant Workers
