Landig sa balay tambalanan ang 65 anyos nga babaye human kining gipusil sa 60 anyos nga suspetsado kapin kon kulang alas 7:28 sa gabie sa Agosto 20 ning tuiga sa Brgy. D. Reconalla, lungsod sa Siocon, Zamboanga Del Norte.
Sumala sa pasiunang imbestigasyon sa Siocon Municipal Police Station, ang biktima kauban sa iyang bana ang nag-andam alang sa panihapon dinha sa ilang kusina dihang kalit nipaka ang buto sa armas ug namatikdan nalang sa bana nga nagkadugo na ang biktima.
Ang suspetsado matod pa giila nga boyfriend sa anak sa biktima. Base sa mga nakasaksi, nakit-an nila ang suspek gawas sa kusina sa biktima kinsa dali usab nga misibat human sa pagpamusil.
Ang biktima nakaangkon ug samad pinusilan sa wala nga dughan ug daling gidala sa Constantino Soriano Sr. Hospital. Narekober sa crime scene ang duha ka fired cartridge sa kalibre 45 nga pistola.
Padayon pa ang gihimong hot pursuit operation sa Siocon MPS aron sa posibleng pagsikop sa misibat nga suspetsado.
Photo Credit: ZNPPO
