Nakatala ang munisipyo sa Pikit ug 11 ka kompirmadong kaso sa tipdas, ang pinakataas sa probinsiya, sumala sa taho sa Provincial Epidemiology and Surveillance Unit (PESU).
Tungod niini, gimandoan sa Lokal nga Panggamhanan ang Municipal Health Office sa pagpalig-on sa kampanya batok sa tipdas pinaagi sa Measles Outbreak Response Immunization, kung asa lakip niini ang paghatag ug usa ka dose sa bakuna sa tipdas sa tanang bata nga nag-edad ug 9 ka bulan ngadto sa 10 ka tuig, social mobilization, koordinasyon sa mga Barangay LGUs, ug aktibong case investigation sa mga bata nga adunay sintomas.
Ang tipdas usa ka makatakod nga sakit nga mahimong hinungdan sa grabe nga mga komplikasyon sama sa pneumonia, paghubag sa utok, impeksyon sa mata ug dunggan nga mahimong hinungdan sa pagkabuta ug pagkabungol, malnutrisyon, ug bisan ang kamatayon.
Nag-unang sintomas niini naglakip sa rashes, hilanat, ug bisan unsa sa mga mosunod: runny nose, ubo, o pula nga mata.
Giawhag sa LGU ang mga ginikanan, nga ipabilin sulod sa balay ang ilang mga anak kung adunay mga sintomas ug ipahibalo dayon kini sa mga Barangay Health Workers sa ilang barangay.
Subling nanawagan ang Municipal Health Office, sa tanang ginikanan nga suportahan ang immunization program ug pabakunahan ang ilang mga anak ug gipaniguro sa MHO nga ang bakuna sa tipdas luwas, epektibo, ug libre sa tanang Barangay Health Stations sa Pikit.
via: LGU PIKIT
