MATI CITY- Sikop sa Cyber Crime Unit sa Davao Oriental ang lima ka indibidwal atol sa gi-setup nga entrapment operation may kalabutan sa iligal nga pagpamaligya og mga pre-registered assorted prepaid SIM cards. Nasakmit ang mga suspetsado sa sulod sa usa ka cellphone store sa Dakbayan sa Mati.
Giila ang mga nadakpan nga sila si Rose, Dario, Mira, Marichu, ug Bernardo, nga mga hamtong ug pulos mga trabahante sa maong cellphone store. Giingong ang ilang ginabaligya nga SIM cards nakarehistro gamit ang peke nga mga pangalan ug mga peke usab nga Government IDs.
Napahigayon ang operasyon sa Cyber Crime Unit human dunay mitaho nga concern citizen kabahin sa giingong ilegal nga online selling. Base sa imbestigasyon, ang mga SIM cards gibaligya sa kantidad nga ₱100 matag usa ug gi-post online nga available na daan para gamiton.
Giatubang karon sa lima ka suspetsado ang kasong paglapas sa Section 11 sa RA 11934 nga nagtumong sa pagpamaligya o pagbalhin sa registered SIM nga walay hustong proseso sa registration. Kalakip usab ang Section 6 sa Republic Act 10175 o Cybercrime Prevention Act of 2012 nga gipatuman batok kanila.
Photo credits: Cyber Crime Unit sa Davao Oriental
