TAGUM CITY- Gipahimangnoan sa Department of Social Welfare and Development (DSWD) ang katawhan batok sa mga nagkatag nga text messages nga nagpakaaron-ingnong gikan sa ilang buhatan ug nag-ingon nga adunay Emergency Cash Transfer (ECT) nga ma-claim.
Base sa mga text nga mikatag, giingon nga maangkon ang ayuda kung ihatag ang GCash number ngadto sa sender. Apan gi-klaro sa DSWD nga kini usa ka scam ug walay tinuod nga kalambigitan sa ilang programa.
Gipasabot sa DSWD nga ang ECT ilang ginahatag lamang sa mga pamilya nga grabeng naapektuhan sa kalamidad sama sa bagyo, ug kini ipahigayon base sa listahan nga gi-assess ug gi-validate sa ilang mga social worker ug lokal nga opisyales.
Walay ECT nga ipanghatag pinaagi sa text link, online form, o bisan unsang klase sa mensahe nga mangayo og personal nga datos o GCash number.
Gidasig sa DSWD ang publiko nga dili motuo niini ug ipaabot dayon ang mga susamang mensahe sa ilang buhatan o sa labing duol nga DSWD field office.
Nagpahimangno usab ang DSWD sa tanan nga likayi ang paghatag og impormasyon sa mga dili pormal nga mensahe, hilabi na kung kini nangayo og kwarta o datos sa digital wallet.
