ILIGAN CITY-Arestado sa mga otoridad ang usa ka 45-anyos nga lalaki, giila nga usa ka high-value individual, human nakuhaan sa gitouhang illegal nga drogang shabu, nga gibanabana nga mobalor sa kapin 2.7 milyon pesos, kung asa nasakmit atol sa gipahigayong buy-bust operation niadtong Agosto 1, 2025, sa Purok 13A, Barangay Palao, Iligan City.
Gipangulohan ang operasyon sa City Drug Enforcement Unit (CDEU-ICPO) ubos sa pagpangulo ni PMAJ Jonan B. Bañas, ug gilatid ubos sa direktang superbisyon ni PCOL Jerry A. Tambis, City Director sa Iligan City Police Office.
Samtang nakig-alayon usab ang mga tinugyanan sa PDEA Region 10 – Iligan-Lanao del Norte, City Intelligence Unit , ug Iligan City Police Station-5 intelligence operatives.
Nasakmit sa mga awtoridad nga mga butang atol sa operasyon nga gilangkuban sa upat (4) ka dagkong cellophane nga adunay sulod nga ginadudahang shabu,duha (2) ka medium-sized heat-sealed sachets, tulo (3) ka gagmay nga heat-sealed sachets,usa (1) ka itom nga handbag,usa (1) ka marked PHP 1,000 bill (Serial No. U437209),usa (1) ka digital weighing scale usa (1) ka cellphone (Honor brand),usa (1) ka pitaka,usa (1) ka disposable lighter. Gibanabana nga motimbang ug 400 gramos ang gibug-aton sa mga nakumpiskar nga droga.
Sa pagkakaron, ang suspetsado anaa na sa kustodiya sa Iligan City Police Station 5 alang sa tukmang lakang ,samtang gihikay na ang kasong paglapas sa Republic Act 9165 o ang Comprehensive Dangerous Drugs Act of 2002.
Nunot niini padayon ang kampanya sa kapulisan ug PDEA batok sa iligal nga droga aron masiguro ang kaluwasan ug kayuhan sa mga Iliganon.
Photo credits: Iligan City Police Station 5
