NABUNTURAN- Nagpahigayon sa usa ka simulation exercise (SIMEX) ug inspeksyon ang duha ka police stations Hulyo 31, 2025, isip kabahin sa paningkamot nga mapaayo pa ang kaandam sa mga kapulisan sa lalawigan. Gipangulohan ni Police Colonel Cesario D. Dukiling Jr., Officer-in-Charge sa Davao de Oro Police Provincial Office.
Gipahigayon ang SIMEX sa Compostela Municipal Police Station sa ala 1:24 sa hapon, diin gitestingan ang kamaayo ug kapasidad sa mga personahe sa pag-atubang sa mga emerhensiyang kahimtang.
Pagkahuman sa maong aktibidad, misunod dayon ang inspeksyon sa New Bataan Municipal Police Station sa alas 1:46 sa hapon. Gitutukan sa maong inspeksyon ang operational capability, disiplina sa mga pulis, ug ang ilang pagtuman sa mga internal nga palisiya ug police protocols.
Matud ni PCOL Dukiling, ang maong mga kalihokan kabahin sa ilang padayon nga inisyatiba aron masiguro nga andam ug epektibo ang mga kapulisan sa pagserbisyo sa katawhan.
Source: DDOPPO
