DIGOS CITY-Duha ka lalaki ang naangol human nabanggaan ang ilang motorsiklo sa usa ka ambulansya sa Davao-Cotabato National Road, partikular sa intersection sa Gumamela ug Rambutan Streets, Brgy. Poblacion Uno, Bansalan, Davao del Sur, sa alas 5:20 sa hapon, niadtong nakalabay nga adlaw.
Giila ang mga biktima nga sila si Jerix Patricio Manceras, 47 anyos, minyo, ug ang iyang back rider nga si Reymart Superales, 29 anyos, ulitawo.
Pareho silang residente sa Brgy. Colorado, Digos City. Gisakyan nila ang usa ka Honda Click motorcycle nga gikan sa Sitio Balutakay, Brgy. Managa, Bansalan ug paingon sa Digos City.
Pag-abot nila sa maong intersection, misulod ang ilang motor sa pinakasulod nga lane sa highway padulong Cotabato. Apan sa kalit lang, nabanggaan kini sa usa ka Nissan Urvan ambulance nga naggikan sa Davao City ug paingon sa Libungan, North Cotabato.
Tungod sa bangga, natumba ang motorsiklo nga miresulta sa pag kaangol sa driver ug back rider niini ug gidala dayon sa mga personahe sa Municipal Disaster Risk Reduction and Management Office (MDRRMO), ngadto sa Davao del Sur Provincial Hospital sa Digos City.
Ang ambulansyang nalambigit sa aksidente nakarehistro ubos sa pangalan sa Province of Cotabato, Amas, Kidapawan City nga gimanehoan ni Florencio Manila Librea, 51 anyos, residente sa Poblacion, Libungan, North Cotabato.
Gidala ang drayber sa ambulansya sa Bansalan Municipal Police Station alang sa hustong disposisyon. Samtang ang duha ka sakyanan nga nadaot sa insidente gikuhaan na og dokumento ug giimbestigahan pa hangtod karon.
