DIGOS CITY- Patay ang usa ka 47-anyos nga babaye human ang iyang gisakyan nga motorsiklo nalambigit sa aksidente sa Brgy. Kinuskusan, Bansalan, Davao del Sur pasado alas 12:35 sa udto Hulyo 30, 2025.
Base sa report sa Bansalan Municipal Police Station, nakadawat sila og tawag gikan sa usa ka concern nga lungsuranon kabahin sa nahitabong aksidente. Gilayon nga miresponde ang kapulisan uban ang traffic investigator aron susihon ang insidente.
Sa ilang pag-abot, ilang naabtan ang usa ka pula nga Euro 125 nga motorsiklo nga gimaneho ni Evangelyn Sumilhig Gerolaga, 47 anyos, residente sa Villa Doneza St., Brgy. Tubod, Bansalan. Kauban niya ang iyang back rider nga si Catherine Bangcot, 28 anyos, residente sa Brgy. Kinuskusan, Bansalan.
Sumala sa back rider, gikan sila sa poblacion sa Bansalan ug paingon sa Purok Rambutan, Brgy. Kinuskusan, sa dihang naabot sila sa kurbadang parte sa kalsada. Didto, natumban sa atubangan nga ligid sa motor ang bato nga nagtapok sa kalsada, hinungdan nga nawala sa kontrol ang driver. Nahulog si Gerolaga ug naligsan og nabunal ang ulo niini sa semento, samtang nalagpot sa sagbotan si Bangcot ug nakaangkon og gamay’ng samad kalawasan.
Samtang daling gidali ang mga biktima sa Mabama Hospital sa Brgy. Poblacion Dos, apan gideklarar nga dead on arrival ang drayber, base sa pahayag sa doktor nga miatiman kanila.
Dugang pa sa imbestigasyon, nakita nga wala nagsul-ob og helmet ang duha nga nalambigit sa aksidente.
