DIGOS CITY- Gisikop sa kapulisan ang usa ka notadong tigpayuhot ug illegal nga droga atol sa gipahigayon nga buy-bust operation sa Brgy. San Jose, Matanao, Davao del Sur, alas 11:18 sa kagabhion kaniadtong Hulyo 28, 2025.
Gipangulohan ang operasyon ni PCPT Junrey L. Torres, Officer-In-Charge sa Matanao Municipal Police Station.
Giila ang suspek nga si alyas “Kimbert”, 28 anyos, ulitawo, ug residente sa maong barangay. Gidakop ang suspek human nga makapalit ang usa ka poseur buyer og ginadudahang shabu gikan kaniya.
Sa follow-up nga inspeksyon, nakuha sa suspetsado ang usa ka pakete sa shabu ug tulo ka pakete sa marijuana nga gibanabana nga nagkantidad og P2,300. Mag-atubang og dinakpan sa kaso nga paglapas sa RA 9165 o Comprehensive Dangerous Drugs Act of 2002.
Gibutyag ni PCPT Torres, padayon ang ilang kampanya batok sa ilegal nga droga ug iyang gi-awhag ang publiko nga motabang sa kapulisan pinaagi sa pagtaho sa ilang buhatan sa mga ilegal nga kalihokan sa ilang komunidad.
