ILIGAN CITY- Sikop sa mga operatiba sa Police Station 2 ang usa ka lalaki nga 58 anyos, human nagpabuto sa iyang armas 3:15 sa hapon niadtongΒ nakalabay nga adlaw sa Purok 22-A, Fuentes, Barangay Maria Cristina, Iligan City.
Migawas sa report nga adunay personal nga gikabangi ang suspek ug gilayon migawas kini ug nipabuto gamit ang iyang armas.
Human sa iyang pagpabuto dali kining misibat sa wala matino nga direksyon, apan nasikop kini sa mga kapulisan sa gipahigayon nga Hot Pursuit Operation human nga bulontaryong gisumbong sa iyang kaugalingon nga anak nga babaye kung asa kini nahimutang.
Nakuha gikan sa dinakpan ang usa ka Caliber 45, SAM 1911 nga adunay Serial Number BT10950151 ug usa ka 45mm steel magazine.
Nagmalampuson ang operasyon sa pagtinabangay sa ICPS2, Iligan City Mobile Force Company (ICMFC) ug ang MASCO.
Sa pagkakaron gikustodiya na ang dinakpan sa Iligan City Police Station 2 (ICPS2) samtang gihikay na ang tukmang kaso batok kaniya.
