DIPOLOG CITY- Nagpagawas ug opisyal nga pahayag ang St. Joseph College of Sindangan, Inc. (SJCSI) kalabot sa nahitabong ngilngig nga disgrasya sa bus diin nalambigit ang ilang mga ROTC cadets nga nahitabo niadtong Hulyo 10, 2025 sa Purok 4, Barangay Mahayahay, Dumingag, Zamboanga del Sur.
Sumala sa pamahayag, 29 ka cadets ang sakay sa bus nga paingon unta sa Pagadian City, alang sa graduation ceremony sa Advanced ROTC Training. Apan, mibuto ang preno sa maong bus nga miresulta sa trahedya. Duha ang dead on the spot, lakip ang usa ka estudyante nga cadete, samtang daghan pa ang nasamdan ug nagpaalim na karon sa nagkadaiyang mga ospital.
Gipadayag sa SJCSI ang ilang pahasubo sa mga pamilya sa mga biktima mitaliwan. Nagpasalamat usab sila sa mga responders nga dali nga mitabang sa insidente. Samtang gisiguro sa eskwelahan ang ilang tibuok suporta ug kooperasyon sa nagpadayon nga imbestigasyon sa maong madugoong aksidente.
