Gipadayag sa usa ka residente ang iyang pagkadismaya tungod sa sunod-sunod nga pagpangawat sa mga metro sa tubig o water meter sa Barangay Ampayon, dakbayan sa Butuan, ug giawhag ang mga hingtungdang opisyal nga molihok aron masulbad ang maong problema.
Base sa reklamo nga gipatik sa social media, mokabat sa unom ka water meter ang gikawat sa maong lugar sa miaging bulan, samtang walo na usab kuno ang gikawat karong higayona, nga mokabat sa 14 ang gikataho nga nawala.
Gipunting usab sa nagreklamo ang kakulang sa aksyon batok sa mga kawatan ug nangayo og tabang sa mga opisyal sa Barangay Ampayon aron mapahunong ang sunod-sunod nga insidente.
Gihangyo usab ang Butuan City Water District o BCWD nga aksyunan ang ilang maintenance ug serbisyo sa tubig, tungod kay naapektuhan na kuno ang mga boarder nga nagpuyo atbang sa Caraga State University sa maong barangay ug wala makasinati og suplay sa tubig.
Sa pagkakaron, wala pay kumpirmasyon kon adunay pormal nang reklamo nga gisang-at ngadto sa kapulisan kalabot sa gikatahong pagpangawat, o kon unsa na ang lakang sa BCWD ug barangay officials aron matubag ang maong problema.
Gilauman nga mahatagan kini og pagtagad sa mga hingtungdang ahensya, ilabi na aron mapanalipdan ang mga pasilidad sa tubig ug malikayan ang dugang nga kadaot sa mga residente.
Photo courtesy: Emica Narisma Plaza










