Nakakuha og lima ka milyon pesos nga pondo alang sa Medical Assistance to Indigent and Financially Incapacitated Patients (MAIFIP) ang lungsod sa Montevista, Davao de Oro pinaagi sa pakigtambayayong sa Department of Health (DOH) Region XI.
Pormal nga gipirmahan ang Memorandum of Agreement (MOA) uban sa Regional Director sa DOH XI alang sa pagpatuman sa maong programa nga nagtumong sa pagtabang sa mga kabus ug pinansyal nga walay kapasidad sa pagbayad sa ilang mga galastuhan sa medikal.
Gipasalamatan ang inisyatibo ug paningkamot ni Congresswoman Maricar Zamora sa pagkuha sa maong pondo, ingon man ang suporta ni Governor Raul Mabanglo.
Gilauman nga makatabang ang 5 milyones pesos sa paghatag og dugang kahigayonan sa mga lumulupyo sa Montevista nga makadawat og pinansyal nga tabang alang sa ilang panginahanglan sa panglawas.










