Nagkahiusa ang mga kabataan gikan sa 11 ka munisipalidad sa Davao de Oro atol sa Provincial Bulilit Funday 2026 nga gipahigayon sa Mawab Municipal Gymnasium niadtong nakalabay nga adlaw.
Gipasiugda sa kalihokan ang pagpalambo sa talento, kahanas ug pagsalig sa kaugalingon sa mga kabataan pinaagi sa nagkadaiyang kompetisyon sama sa singing, declamation o tula, folk dance, modern dance ug drawing.
Sa iyang mensahe, nga gihatod ni Private Secretary Jerico Andales Acana, gipasiugda ni Mayor Myrill Apit ang kamahinungdanon sa paghatag og oportunidad sa mga bata nga mapalambo ang ilang abilidad ug aktibong makaapil sa komunidad.
Naghatag usab og mensahe si Former Board Member Kris Caballero, Provincial GAD Focal, nga nagpasiugda sa papel sa kabataan sa pagpalambo sa katilingban.
Pinaagi sa maong kalihokan, gipakita ang panaghiusa sa mga lokal nga panggamhanan sa pagpalig-on sa mga programa alang sa kaayohan ug kaugmaon sa mga kabataan.
Photo courtesy: Municipality of Mawab










