Nagpadayon ang paghatod sa tabang ngadto sa mga lumulupyo sa Zamboanga Sibugay pinaagi sa Bawat Bayan Makikinabang Rice Distribution Program, usa ka inisyatibo ni President Ferdinand “Bongbong” R. Marcos Jr. nga nagtumong sa pagpalig-on sa seguridad sa pagkaon ug pagtabang sa mga pamilyang Pilipino. Karong higayona, miabot na ang maong programa sa nagkalainlaing barangay sa lungsod sa Kabasalan.
Personal nga gipangulohan ni Governor Ann K. Hofer ang pag-apod-apod sa bugas, kauban si Vice Governor RicRic Olegario ug Municipal Administrator Atty. Lycel Castor-Tan. Pinaagi sa maong programa, gitumong nga mahatagan og dugang suporta ang mga pamilyang nanginahanglan, ilabi na sa pag-atubang sa adlaw-adlaw nga panginahanglan sa pagkaon.
Nagpakita usab ang maong kalihokan sa kamahinungdanon sa koordinasyon tali sa nasyonal ug lokal nga pangagamhanan aron mas mapalapad ang paghatag og serbisyo sa katawhan. Gilauman nga pinaagi sa padayon nga pagtinabangay, mas daghang pamilya sa Zamboanga Sibugay ang makabenepisyo sa mga programa nga nagtumong sa food security ug kaayohan sa komunidad.
