Patay na dihang nakit-an ang usa ka wala pa mailhing lalaki nga giingong milukso sa taytayan sa Abad, Barangay Singcang-Airport, Bacolod City, pasado alas-6 sa buntag niadtong Huwebes, Oktubre 15. Gibanabanang nag-edad og 50 hangtod 60 anyos ang biktima. Nagsul-ob kini og asul nga sando, maong nga shorts ug top-sider nga sapatos.
Matod sa mga nakasaksi, nakadungog sila og kusog nga pagbagsak sa suba ug nagtuo nga sako sa basura ang nahulog. Apan sa ilang pagsusi, nakita nila ang usa ka lalaki nga naghapa sa tubig. Gidala sa sulog ang lawas sa biktima pipila ka metros gikan sa gituohang iyang giluksoan nga dapit. Wala na kini’y kinabuhi sa dihang nakit-an.
Hangtod karon, wala pa mailhi ang identidad sa biktima ug gidala ang iyang lawas sa ABE Funeral Homes.
Photo courtesy: watchmendailyjournal.com
