Nagbabala ang Cotabato City Police Office o CCPO sa publiko laban sa pagbili at paggamit ng mga pekeng gamot na maaaring magdulot ng panganib sa kalusugan at buhay ng mga mamamayan. Sa pamamagitan ng information campaign, pinaalalahanan ng kapulisan ang publiko na maging mapanuri sa pagbili ng mga gamot at tiyaking lehitimo at ligtas ang mga produktong ginagamit upang maiwasan ang posibleng masamang epekto ng mga ito sa kalusugan.
Ayon sa paalala ng pulisya, mahalagang bumili lamang ng mga gamot sa mga lisensiyadong botika o pasilidad pangkalusugan. Pinayuhan din ang mga mamamayan na suriing mabuti ang label at packaging ng gamot, kabilang ang pangalan ng produkto, manufacturer, lot number, at expiration date. Hinihikayat din ang publiko na iwasan ang mga gamot na may kahina-hinalang mababang presyo o sirang balot, at kumonsulta sa doktor o pharmacist bago gumamit ng anumang gamot. Dapat ding iwasan ang pag-inom ng mga gamot na nangangailangan ng reseta nang walang kaukulang pahintulot ng doktor.
Samantala, hinimok ng CCPO ang publiko na ireport sa Philippine National Police o PNP at Food and Drug Administration o FDA ang anumang kahina-hinalang pagbebenta ng mga gamot upang agad itong maaksyunan ng mga kinauukulan. Layunin ng kampanya na mapalawak ang kaalaman ng mga mamamayan tungkol sa panganib ng pekeng gamot at maprotektahan ang kanilang kalusugan at kaligtasan. Paalala sa mga Ka-Juander, maging mapanuri sa pagbili ng gamot, tiyaking sa lehitimong botika ito binibili, at huwag isugal ang kalusugan sa mga produktong hindi tiyak ang pinagmulan at kaligtasan.
