Nadakpan ang upat (4) ka indibidwal nga nagpalusot sa mga smuggled nga sigarilyo sa hiniusang pwersa sa nagkadaiyang yunit sa kapulisan, intelligence units, Philippine Army ug ubang ahensiya sa gobyerno atol sa regular checkpoint operation sa may alas 9:30 sa buntag niadtong Oktubre 13, 2026 sa Barangay Libertad, Kolambugan, Lanao del Norte.
Giila ang mga suspek nga sila alyas “Jer,” 33 anyos; “Bani,” 21; “Ray,” 50; ug “Dan,” 22, ug mga residente sa Barangay Pag-Laum, Pagadian City, Zamboanga del Sur.
Subay sa report, nga atol sa operasyon gisita sa mga otoridad ang usa ka green nga Isuzu Elf dropside truck nga may plakang JBH 6074, nga padulong sa Iligan City.
Atol sa inspeksyon narekober ang 2,255 ka ream sa sigarilyong Castorce ug 347 ka ream sa Cannon, nga mokabat sa kinatibuk-ang 2,602 ka ream ug adunay gibanabanang kantidad nga 2,081,600 pesos. Tungod niini, gi-impound sa mga otoridad ang maong trak ug ang yawe sa sakyanan.
Sa pagkakaron, gidala ang mga nadakpan sa Kolambugan MPS alang sa dokumentasyon, sa wala pa sila itugyan sa Bureau of Customs o BOC alang sa tukmang aksiyon samtang ang mga nakumpiskang sigarilyo ug ang sakyanan anaa sa kustodiya sa 1st Provincial Mobile Force Company, samtang gihulat ang pormal nga pagtugyan niini ngadto sa BOC.
Photo Courtesy: PNP Lanao del Norte
