Nadakpan ang usa ka hamtong nga lalaki nga residente sa lungsod sa Tungawan, Zamboanga Sibugay, atol sa buy-bust operation nga gipahigayon sa kapulisan alas 9:00 sa gabii niadtong Oktubre 13, 2026, sa lungsod sa Ipil.
Gipahigayon ang operasyon sa Special Drug Enforcement Team o SDET sa Ipil Municipal Police Station, kauban ang Philippine Drug Enforcement Agency o PDEA Sibugay, 903rd Regional Mobile Force Battalion 9 ug Zamboanga Sibugay Maritime Police Station o ZSB MARPSTA.
Nakumpiskar sa operasyon ang pito ka heat-sealed transparent plastic sachet nga adunay puti nga kristal nga substansiya nga gituohang shabu, diin usa ang buy-bust item ug unom ang narekober gikan sa suspek. Gibana-bana nga 3.5 gramos ang kinatibuk-ang gibug-aton sa gidudahang droga, nga adunay standard drug price nga 23,800 pesos.
Narekober usab ang 500-peso bill nga gigamit isip marked money, usa ka asul nga Realme cellphone nga adunay itom nga casing, usa ka matte brown nga Honda Click 125 nga motorsiklo nga adunay plaka nga JH213M, ug usa ka itom nga sling pouch nga adunay ID holder.
Gidala ang suspek sa Ipil Municipal Police Station alang sa hustong disposisyon, samtang ang mga nakumpiskar nga ebidensiya nga gidudahang droga gidala sa Zamboanga Sibugay Forensic Unit alang sa qualitative ug quantitative examination. Ang kaso iproseso subay sa mga pamaagi ug probisyon sa balaod.
