Gipasalig sa Provincial Government of Bukidnon nga paningkamotan nilang direktang motuhop ug mabati sa matag pamilya ang tanang kalamboan ug benepisyo gikan sa ekonomiya sa probinsya.
Kini ang lig-ong gibutyag ni Governor Rogelio Neil P. Roque atol sa Provincial Product Accounts (PPA) Dissemination Forum sa PSA-Bukidnon niaging Oktubre 13, 2026. Gipasabot sa gobernador nga ang tanang giya ug plano sa kagamhanang probinsyal kinahanglang nakatutok sa tinuod nga sitwasyon ug panginahanglan sa komunidad. Bahin niini, gamiton sa panggamhanan ang datos gikan sa PSA alang sa sakto ug maayong pag-apud-apud sa pondo sa publiko ug sa paghimo og mga direktang interbensyon para sa katawhan.
Subay sa taho nga gipresentar ni PSA-Bukidnon Chief Statistical Specialist Maria Evangeline N. Non, nagtala og 2.7 porsyento nga pagtubo ang ekonomiya sa Bukidnon sa tuig 2025 diin miabot sa ₱274.85 bilyon ang Gross Domestic Product (GDP) sa probinsya—mas hinay kumpara sa 3.8 porsyento sa miaging tuig.
Namatikdan sa datos nga mikusog pag-ayo ang mga sektor sa public administration and defense (17.8%), health and social work (14.3%), ug financial activities (11.4%), samtang mius-os ang sektor sa construction (-18.6%) ug mining (-9.3%). Nonot niini, gipaspasan karon sa probinsya ang pagpalambo sa mga importanteng sektor sama sa Bukidnon Coffee Roadmap ug sa dairy industry aron sa pagtuboy sa panginabuhian sa katawhan ug pagpanalipod sa kinaiyahan.
Photo courtesy:LGU – Bukidnon
