Mokabat sa P54.5 milyones ka pesos nga pondo alang sa napulo ka Farm-to-Market Road o FMR projects sa Cotabato Province ang unang hugna nga gitugyan sa Department of Agriculture Region 12 niadtong Oktubre 12, 2026, sa Balindog Research and Experiment Station sa Kidapawan City. Gipangulohan ni Regional Executive Director John Pascual ang seremonyal nga pagtugyan sa pondo nga gikan sa General Appropriations Act alang sa fiscal year 2026.
Ang mga benepisyaryo sa pondo mao ang Department of Public Works and Highways sa Cotabato 2nd ug 3rd District Engineering Offices, ug ang lokal nga kagamhanan sa Kidapawan City.
Tumong sa maong mga proyekto nga tukoron ug ayohon ang mga dalan nga nagdugtong sa mga umahan ug merkado aron mas mapadali ang pagdala sa mga produktong pang-agrikultura.
Gilaoman usab nga pinaagi niini, mamenosan ang gasto sa transportasyon sa mga mag-uuma ug mapalambo ang ekonomiya sa mga komunidad nga nagsalig sa agrikultura sa Cotabato Province.
Photo courtesy: Agri tayo Soccsksargen
