Gi-turnover ni Kidapawan City Mayor Atty. Jose Paolo Evangelista ang 10 ka walk-through metal detectors nga ipahimutang sa dagkong mga eskwelahan sa siyudad, atol sa Monday Convocation sa City Government niadtong Oktubre 12, 2026, sa Kidapawan City Gymnasium.
Matud sa mayor, lakip sa mga eskwelahan nga unang makadawat sa maong security equipment ang Kidapawan City Pilot Elementary School, Kidapawan City National High School ug Saniel-Cruz National High School. Gipasalig usab niya nga ang City Government ang motubag sa gasto sa pag-instalar niini, samtang giawhag ang mga eskwelahan nga ampingan pag-ayo ang mga kagamitan nga gitagana alang sa ilang seguridad.
Alang sa ubang mga eskwelahan, nangayo si Evangelista og pagsabot ug pagpailob samtang gitun-an pa sa lokal nga gobyerno ang hustong pamaagi sa paghatag ug pag-instalar sa mga metal detector. Tumong sa maong lakang nga mapalig-on ang seguridad sa mga kampus ug ang pagbati sa kaluwasan sa mga estudyante, magtutudlo ug ubang personnel sulod sa eskwelahan.
