Patay ang usa ka pulis samtang nabali ang wala nga paa sa iyang menor de edad nga anak human mabangga ang ilang gisakyang motorsiklo sa usa ka Toyota nga sakyanan sa National Highway, Barangay La Purisima, Cagwait, Surigao del Sur, alas 7:25 sa buntag niadtong nakalabay nga adlaw.
Base sa inisyal nga imbestigasyon sa Cagwait Municipal Police Station (MPS), nagbiyahe ang Toyota gikan sa Tandag City padulong sa Mangagoy, Bislig City, dihang kalit matud pa nga mibuto ang usa sa mga ligid niini sa wala nga bahin.
Ang maong sakyanan gimaneho ni Joven Nick Labrado Acosta, 37 anyos, Area Manager sa MLhuillier ug residente sa Purok Mangga 2, Barangay Purisima, Tago, Surigao del Sur. Kauban niya sa sakyanan si Manuel Talucod Caperig Jr., 29 anyos, Computer Technician sa MLhuillier ug residente sa Purok 1, Barangay San Roque, Madrid, Surigao del Sur.
Gikatahong tungod sa pagbuto sa ligid, nawad-an og kontrol ang drayber sa Toyota ug misimang ngadto sa pikas lane, diin nabanggaan niini ang usa ka dark blue nga Mio i125 nga motorsiklo.
Ang motorsiklo gimaneho ni Police Staff Sergeant (PSSg) Renato N. Etaoc, 39 anyos, sakop sa 1st Provincial Mobile Force Company sa Surigao del Sur Police Provincial Office. Angkas niya ang iyang menor de edad nga anak ug padulong unta sila sa Barangay Bacolod sa dihang nahitabo ang aksidente. Tungod sa kusog nga impact sa bangga, gikatahong natumba ug nangatagak gikan sa motorsiklo ang pulis ug ang iyang anak.
Dali silang gitabangan sa Municipal Disaster Risk Reduction and Management Office (MDRRMO) sa Cagwait ug gidala ngadto sa Adella Serra Ty Memorial Medical Center sa Tandag City alang sa dinaliang pagpatambal. Apan, namatay ang pulis samtang ang iyang anak nakaangkon og bali sa wala nga paa. Wala usab maangol ang drayber ug ang kauban niini nga sakay sa Toyota.
Sa pagkakaron, gipahimutang na ang patayng lawas sa pulis, samtang padayon pang nagpaalim sa balay tambalan ang iyang menor de edad nga anak.
