Tulo ka indibidwal nga giingong miyembro sa Communist Terrorist Group (CTG) ang misurender human sa usa ka armadong engkwentro sa Barangay Bakingking, lungsod sa Esperanza, Agusan del Sur, diin gipakita sa mga sundalo ang paghatag og tabang sa mga misurender.
Ang maong operasyon gipahigayon sa mga tropa sa 88th Infantry “Maringal” Battalion, ubos sa 4th Infantry Division sa Philippine Army, pinaagi sa pagpangulo ni Lieutenant Colonel Arnold M. Bautista.
Sumala sa report sa militar, nasagap sa mga sundalo ang mga miyembro sa CTG nga misulay sa pag-ikyas gikan sa maong lugar. Miresulta kini sa pagsurender sa tulo ka indibidwal, lakip ang duha ka babaye nga giila nga sila Cherelyn Cuarisma Magsayo, alyas “LIAN,” ug Marilyn D. Taquin, alyas “MAYUMI/NICOLE/MAYANG.”
Human sa insidente, gilayon nga gitutokan sa mga tropa ang panginahanglan sa duha ka babaye. Misurender usab si Angelito Tahal Torres, alyas “ERIN,” nga giila isip platoon medic ug team leader sa Headquarters Force Neo, NCMRC. Ang maong kalampusan, bunga sa paningkamot sa kasundaluhan nga mahatag ug mamintinar ang kalinaw sa komunidad.
Ang mga dinakpan, plano usab nga ipailawom sa mga programa sa gobyerno aron matabangan sila bga makabalik sa komunidad.
Photo courtesy: Kalinaw News
