Misalmot ang mga personahe sa Agusan del Norte Police Provincial Office (ADNPPO), lakip ang 1st ug 2nd Provincial Mobile Force Company (PMFC), sa boluntaryong pagdonar og dugo nga gipahigayon sa lobby sa ilang buhatan sa probinsya.
Ang maong kalihokan gisugdan ni Provincial Health Officer II Dr. Odelio Y. Ferrer, MD, sa pakigtambayayong sa Philippine Red Cross Butuan City–Agusan del Norte Chapter.
Matud ni Police Colonel Ruel M. Cagape, provincial director sa ADNPPO, dako ang kahulogan sa matag bag sa dugo nga makolekta tungod kay makatabang kini sa pagluwas sa kinabuhi sa mga pasyenteng nanginahanglan og dugo.
Gipasiugda usab ni Cagape nga ang pagdonar og dugo dili lamang usa ka paagi sa pagserbisyo sa publiko, kondili timaan usab sa pagpakabana ug gugma sa isigkatawo.
Pinaagi sa maong inisyatiba, gipakita sa mga personahe sa kapulisan ang ilang suporta sa mga programa sa panglawas ug ang ilang kahanduraw sa pagtabang sa mga nanginahanglan.
