Gipasiugdahan sa 53rd Infantry MATAPAT Battalion, ubos sa 1st Infantry TABAK Division sa Philippine Army, ang kasamtangang pag-andam sa mga reservist alang sa kalinaw ug seguridad sa probinsya sa Zamboanga del Sur ngadto sa mga trainee sa Basic Citizen Military Training (BCMT) Class 01-2026.
Gihimo atol sa pagbisita sa mga trainee sa hedkuwarter sa 53rd Infantry Battalion, nga nahimutang sa Camp Major David P. Sabido, Poblacion, lungsod sa Guipos Ning probinsya.
Atol sa maong pagbisita, gipahibalo sa battalion ang mga trainee bahin sa mga kalampusan sa ilang yunit, nagpadayong operasyon alang sa seguridad, ug mga kalihokan uban sa komunidad.
Gipahigayon usab ang usa ka static display sa mga kagamitang militar ug demonstrasyon sa Close Quarter Battle CQB, aron mas masabtan sa mga trainee ang mga kagamitan, kapasidad sa operasyon, ug kaandam sa mga sundalo sa pag-atubang sa nagkalain-laing hagit sa seguridad.
Dugang pa dako ang papel sa mga reservist sa pagtabang sa regular nga pwersa sa panahon sa nasudnong emerhensiya, armadong panagbangi, pagtubag sa kalamidad, ug mga operasyong makatawhanon.
Gipasiugda sa maong diskusyon ang kamahinungdanon sa disiplina, pagpangandam, panaghiusa, ug propesyonalismo aron ang mga reservist mahimong andam ug epektibong makatubag sa nagkalain-laing panginahanglan, lakip na ang pagtabang sa mga komunidad nga naapektuhan sa kalamidad ug uban pang emerhensiya.
Pinaagi niini nga mga kalihokan, nagpadayon ang 53rd Infantry Battalion sa pagpalambo sa mga reservist nga adunay disiplina, kahibalo, ug pagtuman sa ilang mga katungdanan, isip suporta alang sa malungtarong kalinaw, seguridad, ug kalamboan sa Zamboanga del Sur.
Photo courtesy: 53rd IB
