Sikop sa mga otoridad ang giilang Top 8 Provincial Most Wanted Person human mapahigayon ang usa ka hiniusang manhunt operation sa Tago, Surigao del Sur kagahapong adlawa, Oktubre 12, 2026.
Naila ang dinakpan nga si alyas “Ram”, 27 anyos, usa ka mag-uuma nga residente sa Purok Pinya, Brgy. Cayale sa nahisgutang lungsod. Gidakop ang suspek sa iyang kaugalingong barangay sa may alas 12:25 sa udto pinaagi sa gahum sa Warrant of Arrest alang sa krimen nga Arson (Pagpangsunog).
Ang maong warrant gi-isyu sa Presiding Judge sa Regional Trial Court, 11th Judicial Region, Branch 40 sa Tandag City, diin adunay girekomendang pyansa nga Php 120,000.00.
Resulta ang operasyon sa pagtinabangay sa Tago Municipal Police Station (MPS), sa pagpanguna ni Acting Chief of Police PCPT Michael G Quisaot, ug sa mga operatiba gikan sa Regional Intelligence Division. Kini ubos sa kamanduan ni Surigao del Sur Police Provincial Office Provincial Director PCOL Jeffrey Lawrence D Mauricio.
Gisiguro sa usab sa kapulisan nga nasunod ang saktong operational procedures diin gipahibalo ang suspek sa iyang mga katungod, gamit ang pinulongan nga iyang nasabtan. Gidala na si alyas “Ram” sa Tago MPS alang sa dokumentasyon ug saktong disposisyon sa dili pa kini itugyan ngadto sa korte nga mi-isyu sa warrant.
Photo courtesy:PNP Surigao Del Sur Police Provincial Office
