Nagpadayon ang Provincial Government of Bukidnon (PGB) pinaagi sa Provincial Person with Disability Affairs Office (PPDAO) sa pagpahigayon og pilot testing evaluation alang sa Most Person with Disability (PWD) Friendly Barangay, Municipality, ug City Award sa tibuok lalawigan.
Gipahayag ni Disability Affairs Officer IV ug Head sa PDAO Dominador Libayao nga ang maong inisyatibo gipatuman subay sa Provincial Ordinance No. 2021-058R o ang Local Magna Carta for PWDs sa Bukidnon. Tumong sa maong ordinansa ang paghatag og tukmang pag-ila ug insentibo sa mga Lokal nga Kagamhanan (LGU) nga nag-unahag sa mga programa, serbisyo, ug kaayohan sa sektor sa PWD sa ilang mga dapit.
Gisusi sa ebalwasyon ang kaandam ug sukdanan sa mga LGU diha sa nagkalainlaing pamaagi sa serbisyo lakip na ang health governance, education, economic opportunities, social welfare, accessibility built environment, transportation, ug general administration.
Ang maong pagsusi nagsugod sa Malaybalay City niadtong Oktubre 1 ug gisundan sa Impasug-ong niadtong Oktubre 8, samtang ipadayon kini sa Lantapan (Oktubre 15), Kitaotao (Oktubre 22), Kalilangan (Oktubre 29), ug matapos sa Dangcagan karong Nobyembre 5, 2026 sa dili pa ang opisyal nga awarding program sa sunod tuig.
Photo courtesy: LGU/PPDO BUKIDNON
