Pito ka mga suspek sa ilegal nga droga ang nadakpan sa nagkabulag nga operasyon sa kapulisan sa Zamboanga Sibugay Police Provincial Office o ZSBPPO, lakip na ang pagpatuman sa search warrant ug buy-bust operation sa nagkadaiyang lungsod sa probinsya.
Sa lungsod sa Malangas, lima ka mga suspek ang nadakpan human gipatuman sa mga personahe sa Malangas Municipal Police Station, kauban ang ubang operating units, ang search warrant tungod sa paglapas sa Republic Act Number 9165 o Comprehensive Dangerous Drugs Act of 2002. Nasakmit atol sa operasyon ang gituohang shabu nga may gibug-aton nga mokabat sa 1.5 gramos ug gibanabanang kantidad nga 10,200 pesos. Narekober usab ang mga drug paraphernalia ug uban pang butang nga may kalabotan sa operasyon.
Samtang, duha pa ka mga suspek ang nadakpan sa managlahing buy-bust operation nga gipahigayon sa mga personahe sa Kabasalan ug Titay Municipal Police Stations sulod sa ilang tagsa-tagsa ka hurisdiksyon. Ang mga gituohang ilegal nga droga nga nakumpiska sa maong mga operasyon adunay kinatibuk-ang gibanabanang kantidad nga 17 mil pesos.
Ang tanang nadakpang suspek ug mga ebidensiya gitugyan sa kustodiya sa kapulisan alang sa hustong dokumentasyon ug tukmang legal nga proseso. Gipasiugda ni PCOL Barnard Danie V. Dasugo, Provincial Director sa ZSBPPO, ang padayong pagpalig-on sa mga operasyong nakabase sa intelligence aron mapugngan ang ilegal nga droga ug mapadayon ang kalinaw ug kahapsay sa tibuok probinsya.
