Nakahatag og dungog sa Pilipinas ug sa Police Regional Office 11 (PRO 11) si Police Lieutenant Colonel Andrea “Andeng” G. Dela Cerna human nakadaog og silver medal sa Shotgun World Shoot 2026 nga gipahigayon sa Corinth, Greece.
Nakab-ot ni Dela Cerna ang maong kalampusan isip kabahin sa Team Philippines, diin nakigkompetensiya kini batok sa dul-an usa ka libo ka mga shooter gikan sa 50 ka nasud sa maong kompetisyon.
Gilangkuban sa 30 ka stages ug milungtad og lima ka adlaw ang maong kalihukan, nga giila isip kinadak-ang shotgun match sa kasaysayan sa International Practical Shooting Confederation o IPSC.
Dugang sa iyang internasyonal nga kalampusan, nakakuha usab si Dela Cerna og unang puwesto sa individual category atol sa CD’s Cup Shoot for a Cause nga gipahigayon niadtong Septiyembre 4 hangtod 5, 2026, sa Ballistic Shooting Range Facility sa Maa, Davao City.
Kabahin usab siya sa Team RHQ nga midaog isip overall champion sa maong kompetisyon. Gipadayag sa PRO 11 ang garbo ug suporta kang Dela Cerna tungod sa iyang sunod-sunod nga kalampusan, nga nagpakita sa iyang kahanas ug dedikasyon sa shooting sports.
Sumala pa nga nagdala ang iyang mga kadaugan og dungog sa kapulisan sa Davao Region ug sa nasud, ilabina sa pagrepresentar sa Pilipinas sa internasyonal nga kompetisyon.
Photo Courtesy: PRO 11
