Pormal nang gihimo ang ribbon-cutting ug turnover ceremony sa bag-ong ₱2.8-milyon nga duha ka andana nga multipurpose building ug barangay hall sa Barangay Bulak, sa lungsod sa Dalaguete. Gipangunahan kini ni Cebu Governor Pamela Baricuatro ug Dalaguete Mayor Bembie Tambis uban sa suporta sa Cebu Provincial Government.
Tumong sa maong proyekto ang paghatag og mas hapsay ug luwas nga pasilidad alang sa lokal nga panggamhanan ug serbisyo publiko sa komunidad.
Nitambong usab sa kalihokan si Bulak Barangay Captain Renante Bengcolita, mga sakop sa Provincial Board nga sila Stanley Caminero, Raymond Calderon, ug Neneth Reluya, ingon man ang mga lokal nga konsehal.
Human sa inagurasyon, gipadayon sa gobernador ang pagbisita sa Bulak Public Market aron personal nga makig-estorya sa mga residente, Barangay Health Workers (BHW), tanod, ug mag-uuma.
Nipasalig usab si Governor Baricuatro og dugang ₱200,000 nga pundo alang sa paghuman sa estraktura sa merkado.
Photo Courtesy: Municipality of Dalaguete
