Nadakpan sa kapulisan ang usa ka 40-anyos nga lalaki nga giklasipikar isip Most Wanted Person (MWP) Top 4 sa municipal level, pinaagi sa pagpatuman sa warrant of arrest sa Task Force Davao Licanan Border Checkpoint sa Barangay Lasang, Davao City, pasado alas 11:59 sa gabii niadtong Oktubre 8, 2026. Ang maong operasyon gipangunahan sa Panabo City Police Station, kauban ang mga personnel sa 2nd Davao Norte Provincial Mobile Force Company, DNPIDMU ug DNPIU.
Base sa report, ang nadakpang suspek residente sa Barangay Tibal-og, Santo Tomas, Davao del Norte, kinsa nag-atubang karon og kaso ubos sa Republic Act 7610 o balaod nga nanalipod sa mga bata batok sa pag-abuso, pagpahimulos ug diskriminasyon.
Ang warrant of arrest giisyu sa Regional Trial Court Branch 3 sa Panabo City, nga may kalabotan sa upat ka criminal case numbers. Ang korte nagtakda og rekomendadong piyansa nga mokabat sa P180-K. Gipahibalo sa kapulisan ang suspek sa iyang mga katungod ubos sa Konstitusyon ug gidala siya sa Panabo City Police Station alang sa dokumentasyon ug tukmang legal nga proseso.
Giawhag usab sa kapulisan ang publiko nga magmatngon ug motaho dayon sa mga kadudahang kalihokan aron makatabang sa pagmintinar sa kalinaw ug kahapsay sa komunidad.
