Nasikop sa kapulisan ang duha ka pinangita sa balaod atol sa manhunt operations. Sumala kang PCOL Warren E. Dablo, Provincial Director sa SDNPPO, ang duha nadakpan subay sa gipahugtan nga police operation aron pangitaon ang gitumbok nga Provincial top 4 most wanted persons.
Naila ang dinakpan nga usa ka 54-anyos nga minyo nga babaye ug residente sa Purok 4, Barangay Cawilan, Tagana-an, nga adunay kasong paglapas sa Republic Act No. 9165 o Comprehensive Dangerous Drugs Act of 2002.
Alas 4:18 sa hapon nadakpan ang maong babaye sa mga operatiba sa Tagana-an Municipal Police Station sa Barangay Sampaguita, Tagana-an.
Ang warrant of arrest gipagula niadtong Septiyembre 22, 2026, sa Regional Trial Court Branch 29 sa Surigao City ubos sa Criminal Case No. 19486, nga adunay gitugot nga piyansa nga P200 mil pesos.
Samtang, nadakpan usab sa mga operatiba sa Bacuag Municipal Police Station ang usa ka 32-anyos nga ulitawo, mag-uuma ug residente sa Purok 1, Barangay Cantugas, Mainit, tungod sa kasong acts of lasciviousness ubos sa Article 336 sa Revised Penal Code.
Ang warrant of arrest gipagula sa Municipal Trial Court, 10th Judicial Region, Mainit, Surigao del Norte, niadtong Agosto 25, 2026, ubos sa Criminal Case No. 4192, nga adunay gitugot nga piyansa nga P36 mil pesos.
Matud ni PCOL Dablo, padayon ang kapulisan sa pagpangita ug pagdakop sa mga indibidwal nga adunay warrant of arrest aron mahatagan ug hustisya ang mga biktima.
