Padayon pang giila sa mga otoridad ang identidad sa usa ka babaye nga napalgang wala nay kinabuhi sa Sitio Lamintao, Barangay Rizal, ning dakbayan sa Surigao, karong adlawa, Oktubre 8, 2026.
Sumala sa usa ka residente nga si alyas James, nakit-an sa iyang uyoan ang patay’ng lawas sa maong babaye mga alas 7:00 sa buntag ug dayon kini gipahibalo kaniya.
Iyang usab kining daling gipahibalo ngadto sa barangay kapitan ug ang presidente sa ilang lugar, nga maoy mitabang sa pagpaabot sa insidente ngadto sa kapulisan alang sa tukmang aksyon.
Dugang pa niya, dugay na nga naglatagaw sa ilang lugar ang maong babaye, apan wala pa nila mahibal-i ang iyang tinuod nga identidad.
Sa pagkakaron gipahiluna na ang patay’ng lawas sa maong babae ngadto sa Valte Funeral Homes nga nahimutang sa Borromeo Street, Barangay Taft, Surigao City.
Gipanawagan usab sa kapulisan ang kabanay o bisan kinsa nga nakaila sa maong babaye nga moduol sa mga otoridad aron makatabang sa pag-ila sa biktima ug aron matagaan siya sa maayong pagpahiluna.
