Permanente na nga may pasilidad para sa pagtuon ang 33 ka kabataan sa Barangay Legodon, isa sa pinakamalayo nga barangay sang Esperanza, Sultan Kudarat matapos makompleto kag pormal nga ginturn-over ang Child Development Center nga may kompleto nga pasilidad sa idalom sang DSWD KALAHI-CIDSS KKB-CDD Program.
Nagabalor sang 2.56 milyones ka pesos ang proyekto, lakip ang 23,500 pesos nga counterpart sang Barangay Local Government Unit. Lakip sa mga benepisyaryo ang mga kabataan halin sa komunidad sang mga Manobo kag Teduray.
May yara sang smart TV, electric fans, mga lamesa kag pulungkuan, kusina, feeding area, kag separado nga kasilyas para sa lalaki kag babayi ang pasilidad.
Suno kay Ruben Sumanggap sang Barangay Preparation Team, madamo na nga beses nga nagbalhin-balhin sang lugar ang mga kabataan bangud wala sila sang permanente nga hulot-klasehan.
Samtang, ginpahayag ni DSWD Field Office XII Regional Director Loreto Jr. V. Cabaya nga importante ang permanente kag nagakaigo nga pasilidad agud masuportahan ang temprano nga edukasyon kag palaabuton sang mga kabataan.
Photo courtesy: DSWD Field Office 12
